Nagy Gusztáv
Xoxamno Joka
Sas kaj nas, sas jekhvar, jekh chorro rom. Xoxamno Joka sas lesko anav. Kattyi shavora sas les, ke chi zhanlas te ginavel len. Sas les vi jekh cino vicolo. Phenel jokhar peska romnyake.
– Muri kuch romnyi, tele trubul te shinas e cine vicolos. Lesko mas kiravas, xas les, e morchi pale biknas.
Vi kade kerdas o xoxamo Joka. E vicolos tele shindas, leski morchi tele kushlas, lesko mas pale peklas, e morchi pale pe jekh rovlyi kercisardas apol po phiko lasla, thaj las o drom angla peste o xoxamno Joka. Gelas perdal ando kaver gav, haj lel te cipil pe vulica.
– Kinen morchi!
O jekh manush cerra shinavel pelate, o kaver maj but, haj inke chi della.
Sakoneske kado phenel, chi davla.
Pala leste zhalas jekh zhukel. Dikhel e vicoloski morchi, haj opre xuttyel palalate te cirdela tele. O zhukel bashol pe morchi, o rom pale phenel:
– Ahaj, ta dema opral varisode, ke kattyenge chi davla!
O zhukel inke majfeder basholas.
– Pe trin rup tuke davla – phendas o rom.
O zhukel hap… tele e morchi, haj ingerdasla kaj e krajeski gropa, so sas telaj dyiz. O rom cipil pala leste.
– Mo, terne Raja, kaj ingresla? phendom, ke kattyenge chi davla, sodenge maglana! Anaba kathe le love so shinadan, ke me kothe dom e morchi! So kames mandar? Dileske dikhesman? Dikhen numa sar assal pe mande!
Sar zhalas maj pashe karing o zhukel kade rudyijas leske.
– An kathe muri morchi!
O zhukel pale basholas sar te azbadosas les varikon, haj las te cirdelpe ande gropako kolco. O rom pale pala leste. Haj sar unzolas palaj morchi o zhukel xukhlastar. Sar xukhlaslar mujal das jekh bari bradyi. Kana dikhlas o rom ke sosi ande piri eftavardesh thaj eftavar mardasles avri o paji. Sa somnakune love, galbi, peline avri andaj bradyi. Phenel o rom e zhuleske:
– Mo, dile me chi xolyajvav pe tute, tuke dav e morchi.
Pala kodo xutyildas e bradyi kusa but somnakaj, haj gelas khere. Sar voj reslas khere aba e romnyi cipilas dural pe leste.
– Ta, tu dilo keres anda tute. Sakon kodo phenel ando gav, ke tu dilyajlan, kaj e zhukleske bikhanes e morchi.
O rom chi del anglal feri shol o kan. Jokhar numa cipil jekh baro pe romnyi.
– Ash! ke te shinotu jekh…
– E romnyi mucisajlas. O rom pale gelas late, haj dasla angaja.
– Muri kuch romnyi, kattyi galbe dasma o zhukel, savo las amari morchi, ke vi amare, shavorenge shavora, shaj barvajen anda lende.
E romnyi dikhel po rom, chi tromal khanchi te phenel, feri gindil, ke o rom chachikanes dilojko, haj las te rovel.
– Na rov dilyore, ke dikhta so andom tuke, thaj lela te putrel avri pesko zubunososa sharadi sas e bradyi. Kana diklas e romnyi phiren le vulici te kinen penge o maj shukar kher. Vi kade sas. E gavesko maj shukar kher kindine. Pala kodo kindine grasten, gruvnyan haj sogodi so nasle angla kadi. Kana dikhlas e gavesko baro Raj lazhajlaspe kathar o rom, haj gelas leste.
– Phenta Joka, sar kerdyilan maj barvalo sar me?
– Bikindom mure vicovoski morchi, thaj pe morchi kattyi love lom, ke barvalo kerdyilom.
O raj feri dikhlas porom haj xojardes gelastar khere. Kaver dyes o raj tele shinandas peske guruven le slugenca, pala kodo avri das ando gav e manushenge, te kecin le morchan pek rovji, thaj te phiren pa jekh vulica pe kaver. Shaj phirnas, ke chi zhukel chi basholasle. Anda kado o raj kerdyilas chorro, anda rom pale barvalo. Vi shute pe leste e gazhe o anav, o xoxamno Joka.