Ravasz József

Suno

(Álom)

Jokhar jek sejori, jek maskar le but, kodo suno dikhlas, ke pe luma jek sib vorbin le Rom, kodi naj kaver, sar e romani sib. Da­raj­las e sejori, ande pesko suno rovelas.

– Me ci som Rom! Me ci avo Rom! E romani sib le corengi sib si!… Phenlas pala jekhavreste. De sagda pa kadi dikhelas suno, pak cini vrama andre phad’ilas ande pesko trajo ci zanlas sar te vorbi e romani sib.

O suno te saj chochavos, e sejori sakofalo. Solas te na trubuj romanes te sit’ol, De sar e sunes nastig saj kines­les, Na losasa gelastar e se­jo­ri romani sib te sit’ol.

Aba dur drom gelas phujatar, kana sigo angla late kerd’ilas jek cino savo.

– Av bachtalo! – najisarde jekhavres.

– Karing, kaj zsas? – puserlas. Lav romani sib te sit’ovav!

– Das duma e sejori. – romani sib? – mucijas pes o savo. – Sostar trubuj tuke e romani sib te sit’os, kana kade vorbisla, sar pal’esko zape.

– Inke ke vorbij les? – akanak inke darajlas sejori. Aba sar te na vorbijas ke me romano savo som, pe mura daki sib vorbij haj hataras jekhavras. Kaver falo man Kamoreske kharen. Haj tut – puselas o savo. Man Mar­ga­ré­take bolde.

– Sukar anav si tu. – lo­salas khamoro.

– Dapol kodi asaves, ke me vorbi e romengi sib? – Aba sartena zanesas romales, me phenav kathar angluno minuto ke ame pej romani sib vorbisaras – zurardas kadi khamoro.

– Dapol! kadi but’i ach­tom. Kapa vorbij, sar anda mu­ra sibako than sar phaka te avasas: Mure gindura sar cirikl’a te avlas. La slobodimaski sib si kadi! – losalas Marga­réta.

Detehara, kapa e sejori opre ustilas, hajgindijas pes sosko suno dikhlas, ande pesko vast las peski skolaki taska haj… kathar kadi vrama la lindrako avri rakhipe zanismaski trus ingrelas la.