Nagy Gusztáv
Le shilesko kraj
Trajilas jokhar jek kraj kon jivende, milaj ande bare zubuneste phirlas. Milaj shindyolas paleste o paji, taj voj, chi atunchi chi lelasles tele pa peste. Sas les trin shukara sheja, thaj chi lelasle khonyik kaj lenqo dad, ke o kraj, dural khandelas sar e dubala. Nichi najolas. O baro zubuno khonyik chi zhanlas tele te lel paleste. Anda kadi le trin sheja avri cipisarade, kon pa lengo dad tele zhanla te lel o baro zubuno, kodalesko avla o dopash krajipe, thaj vi e maj cini krajaskinya.
Kethane avile, sar ashunde, kraja, grofura, haj shukara terne shave. Nas cini butyi o zumajimo, ke kon chi zhanlas tele te lel, o zubuno kodolesko shero aba, vi po kilo shute le ketani. Po agor reslas kothe jekh shavo.
Soj o shavo, axtom peko somnakunoj, apol shaj sas shukar kana ande chorre kirpende sas urado. Le forroske manusha avri assadeles. Inke vi le krajeske asva avri pittyajle, kasavo lasho assajlas.
– Si tut dad thaj dej muro shavo?
Si, kraja tyo baripe. Avla tyira sha sokro taj sokra. Kathar kodo chi trubuj te daras. Haj si man vi deshuduj phral kaske mishto avela o dopash krajimo. Le forroske manusha shindyonas ando assape.
– Atunchi, aba shaj zumaves tele te les pa mande o baro zubuno muro shavo!
O cino romano shavo chi das majbut duma. Kothe tordyilas pasha kraj. Avri phendine leske ke vastesa nashtig unzol karing leste. Kas aba opre cirde pe kile, kodola zumavnaspe vi jagasa, vi pajesa haj inke chi molas khanchi. O kraj, chi shudas tele o zubuno. O cino romano shavo mutos beshelas. ke voj zhanlas sostar. Khere aba sogodi avri arakhlas. Sode pishoma sas kaj le rom: sa kethane kidas len andek glazha. Avri puterdas la glazhako muj, haj sa po kraj shordas le pishomen. Churindenas les vi katkar vi kothar...
O kraj zurarlas pe peste, po agor aba cipija, vatyijas, haj sas te shudel tele o baro zubuno.
– Mukma aba muro shavo, zhav te najuvav.
– Atunchi xuttyi andre ando paji! kusa tyire gada!
O kraj hatyardas andaj vorba, thaj nashlas te najol. Kade avilas e shaveski bax.
Romnyake las la cina krajaskinya taj vi leske but phral barvajle. Zhi adyes trajin tena mule.